मधेसीसँग अनौपचारिक वार्ता
काठमाडौं, २७ भदौ । आन्दोलनरत मधेसी दलका नेताहरूले तत्काल औपचारिक वार्ता हुने सम्भावना नदेखिएको बताएका छन् । सेना फिर्ता र विगतका सम्झौता कार्यान्वयन गर्ने पक्षमा सरकार नरहेकाले वार्ताको वातावरण नबनेको उनीहरूको भनाइ छ ।
संघीय समाजवादी फोरमका नेता अशोक राईले वार्ताका लागि प्रक्रिया रोकिएको भन्दा पनि छल गर्न खोजेकाले तत्काल वार्ता हुने सम्भावना नदेखिएको बताए । ‘अहिलेकै अवस्थामा वार्ताको सम्भावना देखिएको छैन,’ राईले नयाँ पत्रिकासँग भने, ‘नेताहरूबीच टेलिफोन वार्ता त भएको छ । तर, त्यो प्रगतिउन्मुख हुन सकेको छैन ।’ वार्ताका लागि पहिलो सर्त नै सेना फिर्ता रहेको उनको भनाइ छ ।
तराई मधेस लोकतान्त्रिक पार्टीका उपाध्यक्ष हृदयेश त्रिपाठीले वार्ताको वातावरण नबनेका कारण आन्दोलनको विकल्प नभएको दाबी गरे । ‘सरकार सेना फिर्ता गर्न तयार देखिएको छैन र मधेसीको मागप्रति गम्भीर पनि देखिँदैन,’ त्रिपाठीले भने, ‘त्यसकारण अहिले नै वार्ता होला भन्ने लागेको छैन ।’
तर, वार्ताबाट समाधान खोज्न पार्टी अध्यक्ष महन्थ ठाकुरसहितका नेता काठमाडौं पुगेको र अनौपचारिक वार्ता भएको त्रिपाठीले जानकारी दिए । अनौपचारिक वार्ताबाट ठोस परिणाम आउने सम्भावना नदेखिएको उनको भनाइ छ ।
वार्ताका लागि मध्यस्थता
सरकार र आन्दोलनरत पक्षबीच वार्ता गराउन मध्यस्थताका रूपमा केही मानवअधिकारवादी र राजनीतिक विश्लेषक लागेका छन् । मध्यस्थताको भूमिकामा दमनाथ ढुंगाना, सुन्दरमणि दीक्षित, दीपेन्द्र झा, तुलनारायण साह, विजयलाल कर्णलगायत रहेको तमलोपाका उपाध्यक्ष हृदयेश त्रिपाठीले बताए । मध्यस्थताको भूमिकाभन्दा पनि वार्ता होस् भनेर आफूहरू लागेको तुलनारायण साहले बताए । उनले भने, ‘हामी आन्दोलनरत पक्ष र सरकारबीच वार्ता होस् भन्ने पक्षमा छौँ, मध्यस्थता नै भन्नेचाहिँ होइन ।’
अनिच्छापूर्वक भए पनि वार्तामा जानु राम्रो हुने नेताहरूलाई भनेको साहले बताए । ‘वार्तामा पुगेपछि मूर्तता आउँछ भनेर मैले मधेसी नेताहरूलाई भनेको हो,’ उनले भने, ‘वार्तामा नगए अन्तर्राष्ट्रिय समुदायले पनि तपाईंहरूलाई गलत देखाउँछ पनि भनेको हो ।’
थारूको वार्ताटोली
थरुहट संघर्ष समितिले सरकारसँग वार्ता गर्न तीन सदस्यीय टोली बनाएको छ । समितिमा राजकुमार लेखी, अमनलाल मोदी, मिनरा चौधरी छन् । प्रधानमन्त्री र संघर्ष समितिका सदस्यहरूसँग शनिबार टेलिफोन वार्ता भएपछि समिति गठन भएको हो । प्रधानमन्त्रीसँग छलफल गरी वार्ताको वातावरण बनाउन समिति गठन भएको समिति सदस्य राजकुमार लेखीले बताए । उनका अनुसार प्रधानमन्त्रीसँग आइतबार वार्ता हुँदै छ ।
