झन् चर्कँदै राप्रपाको विवाद
काठमाडौं, २२ भदौ । राष्ट्रिय प्रजातन्त्र पार्टीको विवाद चुलिँदै गएको छ । पशुपतिशमशेर राणा पक्षले आइतबार आफूविरुद्ध हस्ताक्षर अभियानमा संलग्न १६ जना केन्द्रीय सदस्यलाई पार्टीबाट निष्कासन गरेको भोलिपल्ट लोकेन्द्रबहादुर चन्द पक्षले ती केन्द्रीय सदस्यको बचाउ गरेको छ ।
राणालाई पार्टी अध्यक्षबाट बर्खास्त गरिएकाले उनले गरेको कारबाहीको अर्थ नहुने भन्दै चन्द पक्षले १६ केन्द्रीय सदस्य पार्टीबाट निष्कासित नभएको दाबी गरेको हो ।
पार्टीका सहप्रवक्ता किरण गिरी सोमबार जारी गरिएको विज्ञप्तिमा लोकेन्द्रबहादुर चन्द वैधानिक अध्यक्ष भएको अवस्थामा अरू कसैले केन्द्रीय सदस्यलाई हटाउन नसक्ने दाबी गरिएको छ । आइतबार बहुमत केन्द्रीय सदस्य आफूसँग भएको दाबी गर्दै चन्द पक्षले निर्वाचन आयोगमा आधिकारिकता दिनका लागि निवेदन दिएको थियो । त्यसपछि राणा पक्षको बैठकले १६ केन्द्रीय सदस्यलाई निष्कासन गरिएको जनाएको थियो ।
